O CHL Meigas pecha unha fin de semana perfecta con vitorias na Liga Regular Prebenxamín e na Plata Feminina
O CHL Meigas de Lugo viviu unha xornada intensa na Liga Regular Prebenxamín 2025/2026 – Xornada 8, disputada no Pabellón Daniel Cordido Castro, nun duelo ante Lostregos que rematou cun claro 10-4 a favor do conxunto local.
O encontro comezou co CHL Meigas adiantándose no marcador, pero Lostregos reaccionou con tres goles moi rápidos en apenas tres minutos, conseguindo darlle a volta ao partido. A pesar diso, o equipo non se descompuxo nin modificou o seu estilo de xogo. Mantivo a calma, seguiu insistindo no traballado nos adestramentos e pouco a pouco foi recuperando o control do encontro. Antes do descanso xa volvía estar por diante e, na segunda parte, impuxo definitivamente o seu ritmo ata pechar unha vitoria ampla. Máis alá do resultado, o partido destacou pola paciencia, a cabeza fría e a confianza no xogo colectivo.
Na mesma categoría, o CHL Meigas enfrontouse ao Club Hockey Isla Pancha nun encontro que rematou 8-1. Foi un partido serio no que o equipo foi de menos a máis, soubo responder tras o 2-1 inicial e acabou impoñendo o seu ritmo con claridade na segunda metade. Máis alá do marcador, volveu verse un grupo con recursos, capaz de xerar ocasións desde o xogo colectivo e de manter un nivel competitivo alto durante todo o encontro. Unha vitoria convincente para pechar unha fase regular moi sólida.
Ademais, o CHL Meigas completou a fin de semana con tres vitorias en tres partidos na Plata Feminina, confirmando que o equipo chega ao tramo final da competición nun dos seus mellores momentos. As xogadoras superaron ao CHL Jujol Jokers por 1-3, a Titanides Elche por 1-2 e a Lóstregas por 1-3, deixando unha imaxe seria, competitiva e cada vez máis consistente.
A xornada do sábado comezou cun triunfo ante CHL Jujol Jokers nun encontro que o Meigas encarrilou cedo. Os goles de Laura Vázquez, Paula Serén e Nerea Gómez deron unha vantaxe importante, e aínda que o rival recortou diferenzas, o equipo mantivo o control sen pasar apuros.
Máis tarde chegou un dos partidos máis esixentes, ante Titanides Elche. O rival adiantouse no marcador, pero o Meigas respondeu con personalidade, mantivo a calma e conseguiu darlle a volta ao resultado cos tantos de Laura Vázquez e Daniela Álvarez, nun triunfo construído desde a paciencia e o traballo colectivo.
O domingo, fronte a Lóstregas, repetíuse un guion similar. O rival marcou primeiro, pero o equipo volveu reaccionar con solvencia. Daniela Álvarez anotou dous goles clave para completar a remontada e Laura Vázquez pechou o encontro co 1-3 definitivo. Un novo partido serio, ben xestionado e cun alto nivel competitivo.
Ao final da fin de semana, o equipo queda cun sabor agridoce: por unha banda, polas boas sensacións e a evidente mellora mostrada nestas últimas xornadas; por outra, pola percepción de ter deixado escapar puntos importantes ao longo da liga. Unha aprendizaxe clara que deixa a tempada, na que o equipo demostrou que tiña nivel para competir mellor, pero tamén que nunha competición non abonda con chegar forte ao final, senón que é necesario manter a regularidade desde o principio.