O Círculo das Artes de Lugo acolle un concerto da Orquestra Sinfónica da Universidade de Oviedo
A Sociedade Filharmónica de Lugo organiza un novo concerto que terá lugar esta tarde de sábado, 29 de marzo, ás 20.00 horas, no Círculo das Artes de Lugo. A entrada será libre ata completar aforo.
Nesta ocasión, a protagonista será a Orquestra Sinfónica da Universidade de Oviedo, baixo a batuta do director Pedro Ordieres. O evento contará ademais coa participación destacada do violinista Héctor Corpus e da violista Ana Montoro.
O repertorio do concerto ofrecerá unha selección de obras de gran calidade e beleza. O público poderá gozar da Abertura de Don Giovanni de W. A. Mozart, seguida da súa Sinfonía concertante para violín, viola e orquestra, unha das composicións máis aclamadas do xenio austríaco.
Para completar o programa, a orquestra interpretará a Florida Suite, do compositor inglés Frederick Delius, unha obra evocadora inspirada nas paisaxes e atmosferas da Florida do século XIX.