O club de lectura “Letras de Castroverde” retoma os encontros en setembro
O club de lectura para adultos “Letras de Castroverde” retomarase este mes de setembro no Centro Sociocultural Paco Pestaña, onde os asistentes se reunirán o último xoves de cada mes en horario de 19.00 a 20.30 horas.
O club está coordinado por Ánxela Gracián e está aberto a todas as persoas maiores de 16 anos, cun custo totalmente gratuíto.
As inscricións poden realizarse nas oficinas municipais ata o 20 de setembro. Para dar comezo á actividade será necesario un mínimo de seis persoas interesadas. O primeiro encontro está previsto para o xoves 25 de setembro.
O pasado mes de febreiro botou a andar esta proposta pensada para que veciños e veciñas con gusto pola lectura poidan xuntarse e compartir a súa experiencia arredor dun libro escollido previamente.
Nos encontros, os participantes comentan o que lles pareceu a obra, as sensacións que lles transmitiu, os aspectos que máis lles impactaron ou, mesmo, aqueles que lles resultaron indiferentes.