O club Ensino fomenta o deporte e a igualdade en Lugo
A Xunta de Galicia, en colaboración co Club Ensino de baloncesto feminino, presentou o Ensino School Prix, unha iniciativa que busca implicar aos centros educativos da provincia de Lugo para fomentar a práctica deportiva e a igualdade entre os máis novos. O programa foi presentado polo delegado territorial de Lugo, Javier Arias, e o presidente do club, Manuel Durán.
O Ensino School Prix desenvolverase ao longo da tempada nos partidos que o Club Ensino dispute como local na Liga Endesa, a máxima categoría do baloncesto feminino español, no Pazo dos Deportes de Lugo. A proposta, de carácter lúdico, está dirixida ao alumnado de Educación Primaria, que participará activamente en cada xornada. En cada partido, os escolares terán a oportunidade de competir de diversas formas: durante as pausas entre cuartos realizarán coreografías de baile, palmas ou cánticos, e tamén se valorarán aspectos como a vestimenta, as pancartas e o colorido que acheguen á grada, así como a participación dos grupos máis numerosos.
Ademais, tres representantes de cada centro enfrontaranse no descanso sobre a pista, amosando as súas habilidades de bote de balón e tiro a canastra. Coa intención de fomentar a afección polo baloncesto, o Club Ensino abrirá as portas do Pazo de forma gratuíta aos centros participantes, creando un ambiente festivo e animado que arroupe ao equipo lucense durante os encontros. Todos os colexios da provincia serán convidados a participar no programa, e con aqueles que se inscriban elaborarase un calendario con polo menos dous competidores en cada partido. O gañador de cada xornada pasará á seguinte rolda, ata que se proclame un campión definitivo.
Como parte desta experiencia, cada centro participante terá como madriñas a dúas xogadoras do primeiro equipo do Ensino. Estas xogadoras visitarán os colexios antes dos encontros para compartir charlas e experiencias co alumnado, expoñendo a realidade do deporte feminino de elite e reflexionando sobre as desigualdades de xénero que aínda existen no ámbito deportivo. Esta iniciativa busca, ademais de fomentar o deporte entre os máis novos, promover valores como a igualdade e o respecto, visibilizando o deporte feminino e a importancia de romper barreiras de xénero.