O Colexio Maristas impulsa unha carreira solidaria en apoio ao acceso á auga potable
O Colexio Maristas volverá apostar polo deporte como ferramenta de solidariedade coa celebración, este venres 20, da carreira solidaria “Gotas UNICEF”, unha iniciativa que busca concienciar e recadar fondos para garantir o acceso á auga potable entre a infancia máis vulnerable.
A actividade enmárcase na campaña “Gotas UNICEF 2026” e contará coa participación de máis de 200 alumnos de Educación Secundaria, que percorrerán a Muralla de Lugo nunha xornada que transcende o ámbito deportivo. Cada metro completado converterase simbolicamente en “gotas”, grazas ao traballo previo do alumnado, que implicou a familiares e amizades na recadación de fondos.
O proxecto vai máis alá da propia carreira. Nas últimas semanas, os estudantes desenvolveron nas aulas distintas actividades centradas na importancia da auga como dereito fundamental, así como na realidade de moitos países onde a falta de acceso a auga potable continúa condicionando a educación e a saúde de milleiros de nenos e nenas.
Con esta proposta, o centro reforza o seu compromiso como referente educativo vinculado a UNICEF, apostando por unha formación que integra valores, participación activa e conciencia global.
A comunidade educativa volve así demostrar que a suma de pequenos xestos pode ter un impacto significativo na mellora das condicións de vida das persoas máis desfavorecidas.