O Comité de Empresa de Cruz Vermella Lugo denuncia a situación salarial do seu persoal
O Comité de Empresa de Cruz Roja Lugo, formado por CCOO e UGT, sinalou as deficiencias salariais que afectan aos traballadores da provincia.
A representación sindical esixiu á organización a aplicación inmediata das condicións salariais mínimas establecidas no convenio sectorial de acción e intervención social.
A pesar de que Cruz Roja Lugo ten un convenio propio a nivel provincial, a reforma do Real Decreto-lei 32/2021 modificou as prioridades de aplicación, especialmente en canto á "cuantía do salario base e dos complementos salariais". Concretamente, elimínase a prioridade do convenio de empresa fronte ao convenio sectorial estatal, autonómico ou de ámbito inferior, respecto a estes aspectos salariais.
O citado Real Decreto-lei tamén establece que o convenio de empresa mantén a prioridade en outros aspectos, como horas extra, distribución do horario, traballo a turnos, planificación de vacacións, sistemas de clasificación e modalidades de contratación, así como medidas de conciliación, entre outros.
Cruz Roja Lugo atópase baixo o marco do convenio sectorial de intervención social, xa que a organización está integrada na patronal Asociación Estatal de Organizacións e Acción e Intervención Social (OEIS) e formou parte activa na negociación deste convenio, ademais de contar cun membro na Comisión Paritaria.
Diante desta situación, CCOO interpuxo un conflito colectivo ante os xulgados de Lugo, ao que se adhiriu UGT, solicitando que se abonen as cuantías establecidas no artigo 51 e no Anexo II do convenio sectorial estatal de acción e intervención social aos traballadores de Cruz Roja.
O 18 de decembro celebrouse o acto de conciliación no SMAC, ao que asistiu a representación de Cruz Roja para manifestar a súa oposición ás demandas plantexadas. Dado que non se alcanzou ningún acordo, o conflito continuará o seu curso xudicial á espera de fixarse unha data para o xuízo, co obxectivo de que se aplique a normativa vixente e se axusten os salarios da plantilla de Cruz Roja Lugo.
A día de hoxe, ademais de "non querer actualizar os salarios e forzar a xudicialización deste asunto, Cruz Roja Lugo mantén paralizada a negociación doutros aspectos do convenio, o que prexudica a unha plantilla composta por arredor de 150 traballadores en toda a provincia", conclúen.