O Concello de Becerreá inicia traballos no depósito de auga e pide un consumo responsable
O Concello de Becerreá anunciou o inicio dos traballos de limpeza e impermeabilización do depósito da traída de augas na Avenida de Sarria.
Estas actuacións comezarán a partir desta semana, do 3 de marzo, e estenderanse ata o 29 de marzo, co obxectivo de mellorar a eficiencia do sistema de abastecemento e reducir as perdas de auga.
Debido a estas intervencións, o subministro de auga realizarase directamente desde a traída, sen almacenamento en depósitos, o que podería afectar a presión e dispoñibilidade do recurso en determinados momentos do día. Por este motivo, o Concello solicita á veciñanza un consumo responsable e reducido ao mínimo indispensable para garantir o abastecemento a todos os fogares.
Así mesmo, recoméndase realizar o uso de electrodomésticos como lavadoras e lavalouzas en horario nocturno para minimizar o impacto no subministro xeral.
Desde o Concello de Becerreá agradécese a colaboración da cidadanía e pídense desculpas polas molestias que poidan derivarse destes traballos necesarios para a mellora do servizo de auga potable.