O Concello de Guntín mellora o acceso e os núcleos de Outeiro e Leboriz, na parroquia de Francos
O Concello de Guntín rematou as obras de mellora dos accesos e dos núcleos de Outeiro e Leboriz, situados na parroquia de Francos. A intervención enmárcase no plan municipal de posta a punto das comunicacións viarias nas zonas rurais, co obxectivo de facilitar o acceso ás vivendas, mellorar a mobilidade veciñal e garantir unhas condicións de tránsito máis seguras.
Os traballos consistiron na reparación e acondicionamento dos camiños que conectan ambos os núcleos, incluíndo o reasfaltado de tramos deteriorados, a mellora da drenaxe e o reforzo das beirarrúas e accesos secundarios.
Tamén levaron a cabo a mellora do acceso dende a CP-1611 a Castelo Grande e Castelo Pequeno, traballos que contribúen a facilitar a mobilidade e garantir vías máis seguras e cómodas para a veciñanza.
Con estas actuacións, o Concello buscou optimizar as comunicacións internas e mellorar o servizo tanto para os residentes como para os vehículos de emerxencia e mantemento que operan na zona.