O Concello de Lugo actualiza o contido das pantallas interactivas
![mauricio-repetto-pantallas-tactiles](https://lugoxa.com/wp-content/uploads/2024/06/mauricio-repetto-pantallas-tactiles.jpg)
O Concello de Lugo vén de actualizar os contidos das pantallas dixitais interactivas situadas no exterior do edificio de Novas Tecnoloxías, na Praza Anxo Fernández Gómez, con información sobre a nova edición do Arde Lucus, que dará comezo esta mesma tarde.
Así o avanzou o edil Mauricio Repetto, quen subliñou que “nos dispositivos tamén figura información sobre a hostalería e o comercio lucense, polo que tanto a veciñanza do municipio como as numerosas persoas que visitarán a nosa cidade esta fin de semana poderán acceder, a través destes soportes a información comercial e de interese dun xeito áxil e interactivo”.
O concelleiro destacou que “os novos contidos foron desenvolvidos polo alumnado e profesorado do obradoiro de emprego e formación ArquivaLugo, que se está a desenvolver no CEI Nodus municipal e no que están a participar 20 persoas que se atopaban en situación de desemprego”.
Os dispositivos ademais de información comercial e gastronómica, ofrecen contidos de interese para os cidadáns como o programa da festa de recreación histórica ou información sobre proxectos europeos como o DUSI Muramiñae e o LIFE Lugo+Biodinámico, así como un boletín de novas relacionadas coa Unión Europea.