O Concello de Lugo amplía o servizo de comedores escolares e prepara o San Froilán 2025
O Concello de Lugo renovou o convenio coa Xunta de Galicia para continuar prestando o servizo de comedores escolares, ampliando a súa capacidade de 757 a 1004 usuarios. Esta iniciativa, asumida polo Concello pese a non ser competencia municipal, evita que cada ANPA teña que asinar o seu propio acordo coa Xunta para ofrecer o servizo. Segundo datos da Concellería de Educación, o investimento municipal ascende a 425.983,80 euros, aos que se suman 97.739,40 euros achegados pola Xunta, que representa menos dunha quinta parte do custo total.
Ademais, aprobouse unha modificación do contrato de mantemento da plataforma entradaslugo.es para ampliar os seus servizos e cubrir o auditorio Fuxan os Ventos, cunha prórroga ata xuño de 2026 que suporá un investimento de 3.993 euros para a área de Cultura. Tamén se iniciou a licitación dun novo contrato para a xestión das dúas casas das linguas municipais, cun orzamento anual de 125.858,10 euros e unha duración inicial dun ano prorrogable ata cinco.
En canto ás festas do San Froilán 2025, aprobaron as bases para a concesión de 160 parcelas do recinto feiral destinadas a postos de venda, xogos de habilidade e atraccións, con prezos de licitación que varían desde 160 euros, para un posto pequeno, ata 13.643 euros para unha gran atracción de 43x19 metros nas proximidades do Parque.
Por último, esta semana Lugo acollerá un momento histórico coa reunión do grupo Fuxan os Ventos no auditorio que leva o seu nome, cos tres concertos completamente esgotados, o que foi destacado como un gran éxito por parte do Concello.