O Concello de Lugo anuncia melloras na rede de auga e pavimentación en Conturiz
O Concello de Lugo presentou á veciñanza de Conturiz os proxectos que a área de Cohesión Territorial levará a cabo nos próximos meses, centrados na mellora de servizos básicos e infraestruturas viarias. Entre as actuacións destacan a ampliación da rede de abastecemento de auga nos núcleos de Castro–San Amaro–Conturiz, cun investimento de 145.155,70 euros e un prazo de tres meses, e a mellora da pavimentación con aglomerado en quente en diversos camiños da contorna, cun orzamento de 122.245,50 euros e prazo de dous meses.
Ademais, está prevista unha terceira obra de renovación do firme, cun investimento superior a 29.000 euros, que mellorará tramos preto do colexio de Nadela e o acceso a unha zona urbanizada en San Xona de Pena. Os traballos de abastecemento de auga comezarán nas próximas semanas e, unha vez finalizados, iniciaranse as actuacións de pavimentación, co obxectivo de completar todas as intervencións no menor tempo posible.
A concelleira Ana González Abelleira destacou a importancia de manter á veciñanza informada e recoller as súas suxestións, sinalando que estas obras forman parte da estratexia municipal de reforzar a cohesión territorial, mellorar a accesibilidade e garantir servizos de calidade en todas as parroquias do municipio.