O Concello de Lugo colaborará co Colexio de Enfermería para visibilizar o ictus
A presidenta do Colexio de Enfermería de Lugo, Eva Gómez Fernández, recibiu ao alcalde de Lugo, Miguel Fernández, e á concelleira de Cohesión Social, Olga López Racamonde, para establecer vías de colaboración para levar a cabo varios proxectos de educación sanitaria dirixidos á poboación, enfocados en dar a coñecer as causas e síntomas do ictus, así como ofrecer formación en Reanimación Cardiopulmonar (RCP) básica. Ademais, tratouse a solicitude á Xunta de Galicia para a implantación da enfermería escolar nos centros educativos, como xa sucede en varios países europeos.
Durante a visita, que tamén marcou un retorno á súa "casa" para os participantes, xa que tanto Fernández como López Racamonde teñen unha longa traxectoria no ámbito sanitario, abordáronse diversas iniciativas. "Estamos moi sensibilizados coa importancia de dar visibilidade a enfermidades nas que a reacción dos cidadáns pode ser crucial, como o ictus ou a parada cardíaca", indicou o alcalde.
Un dos primeiros proxectos que se levará a cabo en maio, con motivo do Día Mundial da Insuficiencia Cardíaca, será unha xornada de formación en RCP básica. Esta actividade, aberta a toda a cidadanía, centrarase en ensinar a técnica de Reanimación Cardiopulmonar e o uso de desfibriladores. O obxectivo é consolidar Lugo como unha cidade cardioprotegida, implicando aos colexios de Enfermaría e de Médicos para difundir a importancia destes primeiros auxilios e normalizar o uso dos desfibriladores como dispositivos que salvan vidas. A edil Olga López Racamonde destacou que en Lugo existen 67 desfibriladores, entre fixos e portátiles, que se utilizarán durante esta xornada de RCP na rúa.
Ademais, buscarase a colaboración do Colexio de Enfermería para avanzar na implantación da enfermería escolar nos centros educativos, unha demanda que xa foi promovida por este colectivo en ocasións anteriores. Seguindo o exemplo doutros países europeos, o alcalde informou a Eva Gómez que o Grupo Municipal do PSdeG-PSOE levará ao pleno unha proposta para instar á Xunta de Galicia á implantación da enfermería escolar. Esta iniciativa ten como obxectivo mellorar a educación en saúde, fomentar a prevención e os hábitos saudables, e proporcionar apoio en situacións puntuais que precisen asistencia sanitaria, como casos de diabetes, trastornos alimentarios, bullying, entre outros.
Finalmente, o Concello tamén apoiará outro proxecto presentado polo Colexio de Enfermería, que busca educar aos nenos e nenas sobre os síntomas do ictus. A través de xogos, recortables e personaxes baseados en avós e avoas, preténdese sensibilizar aos máis pequenos sobre os signos dun accidente cerebrovascular. Profesionais deste colexio serán os encargados de impartir estas sesións informativas nos centros educativos.