O Concello de Lugo desbroza e limpa máis de 40 quilómetros de vías en 15 parroquias durante o verán
A brigada de Cohesión Territorial do Concello de Lugo levou a cabo nas primeiras semanas do verán traballos de desbroce e limpeza en máis de 15 parroquias do municipio, actuando en máis de 40 quilómetros de pistas e camiños. As intervencións centráronse na mellora de vías rurais, accesos a núcleos e espazos comunitarios como campos da festa ou contornos de igrexas.
Os labores realizáronse con persoal municipal, a través dunha brigada de catro operarios equipados con desbrozadoras manuais e sopladores, contando ademais co apoio de maquinaria do parque móbil, incluíndo un tractor con desbrozadora de brazo articulado que facilitou a actuación en tramos máis longos.
A concelleira de Cohesión Territorial, Ana Abelleira, explicou que a planificación destes traballos responde ás necesidades reais das parroquias, que se intensifican no verán pola celebración de festas e romarías, así como pola actividade agrícola e forestal. Destacou que o obxectivo é ofrecer servizos dignos e de calidade á veciñanza do rural tamén nestas datas, reforzando o compromiso do Goberno local coas zonas non urbanas.
As parroquias nas que se actuou inclúen Ribas de Miño, Cuiña, Monte de Meda, Soñar, San Xoán do Campo, Coeses, Torible, Vilamoure, Pías, San Pedro de Mera, Orbázai, O Veral, Mazoi e Muxá, ademais de intervencións recentes en Góndar e novamente en San Xoán do Campo. En lugares como Ribas de Miño traballouse no acondicionamento do campo da festa, mentres que noutros puntos se limpou o acceso a espazos públicos de uso frecuente.
Abelleira salientou tamén a implicación e coñecemento do territorio por parte do equipo municipal, subliñando que cada quilómetro desbrozado supón un paso máis cara á igualdade real de servizos para todo o municipio. Avanzou que o dispositivo continuará operativo nas próximas semanas para atender o resto das parroquias, seguindo a planificación anual de melloras nos viais e espazos públicos das 54 parroquias de Lugo.