O Concello de Lugo desprega bombeiros para colaborar na extinción dos incendios en Quiroga
O Concello de Lugo enviou un destacamento especial do Servizo de Prevención, Extinción de Incendios e Salvamento para colaborar nas tarefas de extinción dos incendios forestais que afectan a Galicia. A unidade, desprazada ao posto de mando avanzado en Quiroga, está formada por 16 efectivos entre bombeiros e mandos, distribuídos en quendas de 4 ou 5 profesionais cada día, cun mando responsable en cada grupo.
O operativo inclúe un vehículo de extinción, outro de transporte de persoal e materiais, así como o equipamento completo de intervención en incendios forestais, co obxectivo de garantir autonomía e capacidade de resposta inmediata sobre o terreo. A concelleira de Cohesión Territorial, Ana González Abelleira, acompañou ao equipo antes da saída e destacou a entrega e solidariedade dos bombeiros lucenses.
O edil de Xuventude, Urbanismo e Deportes, Jorge Bustos, tamén estivo presente e subliñou que a coordinación entre administracións é clave en momentos críticos, lembrando que o Concello de Lugo está sempre disposto a arrimar o ombreiro. O despregamento responde á chamada de colaboración cos corpos de emerxencia galegos, reforzando a rede de solidariedade e cooperación entre concellos para ofrecer maior seguridade ás persoas afectadas polos lumes.