O Concello de Lugo destinará máis de 140.000 euros para o cemiterio de mascotas
A instalación do cemiterio destinado a mascotas e animais de compañía ubicarase nas inmediacións do actual cemiterio municipal, nunha parcela anexa de aproximadamente 800 metros cadrados, tal e como informaron desde a Tenencia de Alcaldía do Concello de Lugo.
O alcalde en funcións do Concello de Lugo, Rubén Arroxo, xunto coa concelleira de Participación e Servizos á Veciñanza, Cristina López, e o edil de Infraestruturas Urbanas, Alexandre Penas, visitaron o espazo e destacaron a importancia desta iniciativa, sinalando que "trátase dunha proposta que a cidadanía levaba tempo reclamando e que será o primeiro cemiterio público de mascotas en Galicia".
O novo espazo estará delimitado perimetralmente e contará cunha zona axardinada equipada con bancos e elementos deseñados para crear un entorno íntimo para o recordo dos animais falecidos. Ademais, disporá de espazos para almacenar as urnas das mascotas incineradas, así como dunha zona específica para depositar a chapa ou a cadea do animal.
O Concello de Lugo destinará un investimento de 141.570 euros para esta actuación, priorizando o uso de materiais naturais e un deseño respectuoso coa contorna. Inicialmente, o cemiterio terá capacidade para 320 mascotas en columbarios individuais para urnas e unha área destinada á disposición de cinzas. Así mesmo, o espazo contará con 19 árbores que proporcionarán sombra e áreas de descanso con bancos. Os sendeiros da zona estarán decorados con pegadas de animais plasmadas en formigón.
Pola súa banda, a concelleira responsable do Cemiterio, Cristina López, subliñou o esforzo realizado nos últimos anos para mellorar o Cemiterio Municipal. "Neste tempo, levamos a cabo a primeira ampliación do cemiterio desde 2006 e melloramos espazos tanto na zona antiga como na nova", explicou. Ademais, engadiu que "seguimos planificando traballos para mellorar o Cemiterio Municipal, atendendo tamén as solicitudes que nos fai chegar a cidadanía".
Este novo cemiterio de mascotas responde a unha crecente demanda da cidadanía e marca un fito na creación de espazos destinados a honrar a memoria dos animais de compañía en Galicia.