O Concello de Lugo devolverá á comisión do Castiñeiro a fianza por ocupar a vía pública
A Tenencia de Alcaldía do Concello de Lugo comunica que, despois de completar o traballo técnico relativo á valoración de desperfectos tras as festas do Castiñeiro, a fianza será devolta integramente á comisión organizadora nos próximos días. Do mesmo xeito lembran que este ano foi a única festa que incumpriu os prazos do procedemento á hora de organizar as actividades, malia que desde o Concello sempre se mantén unha postura de "colaboración e flexibilidade" coas comisións de festas dos distintos barrios ante a organización de festas e eventos.
As festas teñen que cumprir coa Lei de Espectáculos Públicos de Galiza, para o que o Concello precisa que se entregue a documentación en prazo antes do inicio das actividades. Desde a Tenencia de Alcaldía solicitan á comisión que non traten de culpabilizar ao Concello para esconder a mala praxe e a mala xestión da festa, dado que foron o único evento que non se puido autorizar na súa totalidade por faltar documentación. Ao longo deste ano, foron autorizadas as ocupacións de vía pública e a instalación de espectáculos nas festas das Gándaras (espectáculos e barracas), a Ponte (espectáculos e barracas), a Piringalla (ocupación de vía pública e barracas), Bispo Basulto (ocupación de vía pública e barracas), Montirón (ocupación de vía pública e barracas), ademais de distintas festas parroquiais e nos lumes novos da noite de San Xoán.
Aseguran que a autorización de festas é un procedemento regulado polo Concello de Lugo e que non depende de ningunha conversa nin cita con ningún concelleiro ou político. Para iniciar o trámite de organización deste tipo de actividades, é preciso que a comisión organizadora presente o modelo 174 cunha antelación mínima dun mes con respecto á data de inicio das festas xunto coa documentación requirida.
Só o certificado da instalación eléctrica poderá entregarse fóra deste prazo de 1 mes, sempre que se entregue antes do inicio do evento, mentres que cada unha das instalacións do apartado C (escenarios, tribunas, carpas, bares, postos de venda, atraccións, etc.) deben achegarse ao Concello como moi tarde 15 días antes do inicio.
Segundo manifestan dende a Tenencia de Alcaldía, o día 24 de maio, enviaron un requirimento á asociación organizadora solicitando a documentación necesaria para a autorización dos distintos postos e barracas. Aseguran que foi lido o día 27 de maio, e parte da documentación foi rexistrada no Concello o día 29. A asociación organizadora entrega nova documentación entre o 31 de maio e o 3 de xuño, a través do rexistro municipal. O 4 de xuño, asínase o Decreto de Autorización para os 9 postos que presentaron a documentación, tras un importante esforzo do persoal técnico municipal para revisar e informar toda a documentación presentada pola Asociación organizadora, sosteñen.
Tras a sinatura do decreto do 9 de xuño, preséntase a documentación de outras barracas, estando a menos de 24 horas da montaxe, o que fixo imposible a execución do traballo do persoal municipal por falta de tempo. Desde a Tenencia de Alcaldía, sendo conscientes da complexidade que require a organización deste tipo de actividades, sosteñen que se lles dá a maior flexibilidade ás comisións organizadoras para entregar a documentación, acurtando os prazos ao máximo sempre que na data de presentación os servizos técnicos do Concello poidan aínda realizar os trámites necesarios para garantir a seguridade e o bo desenvolvemento das festas.