O Concello de Lugo impulsa a mellora das infraestruturas de Dano Cerebral Lugo
A área de Cohesión Social do Concello de Lugo segue apostando pola mellora da atención ás persoas afectadas por Dano Cerebral Adquirido (DCA) co impulso dunha nova sede para a asociación Dano Cerebral Lugo (ADACE Lugo).
O obxectivo é proporcionar un espazo máis amplo que permita mellorar a atención que actualmente se presta nas súas instalacións da Avenida Adolfo Suárez, que acolle a uns 20 usuarios no centro de día e atende a máis de 50 persoas ao mes a través de obradoiros, programas de autonomía persoal e actividades de ocio.
A edil de Benestar Social e Maiores, Olga López Racamonde, destacou a necesidade dunha nova sede para a asociación, subliñando que "Adace necesita un local de maior superficie, unha demanda totalmente xustificada pola alta incidencia do Dano Cerebral Adquirido e o incremento que está a experimentar esta patoloxía nos últimos anos". López Racamonde asegurou que o Goberno Local está comprometido co colectivo e que buscará alternativas para mellorar as infraestruturas, garantindo a máxima axilidade na concesión de licencias e na valoración de locais privados.
A reunión contou coa participación de representantes de ADACE, como a súa presidenta Ana Cabellos, o secretario Ángel Sánchez, a directora xerente Libertad Martínez e o vogal Paco Quiles, xunto con membros de Dano Cerebral Galicia, incluíndo o presidente Luciano Pintor e a directora Leticia Vila, así como responsables de Dano Cerebral Lugo, como a súa presidenta Ángeles Rozas e a directora Iria Abel.
Durante o encontro, tamén se abordaron outras importantes cuestións, como a necesidade de que os pacientes que sufriron un accidente cerebrovascular (ACV) se rexistren correctamente como persoas afectadas por DCA. A edil explicou que na actualidade, os datos dos pacientes de ACV non se recollen de forma adecuada, o que afecta a precisión dos rexistros oficiais. Segundo a Enquisa de Discapacidade, Autonomía Persoal e Situacións de Dependencia do Instituto Nacional de Estadística, en Galicia existen ao redor de 35.000 persoas afectadas por DCA, e cada ano prodúcense máis de 7.000 novos casos.
Por parte da asociación Dano Cerebral Lugo indicaron que moitos dos pacientes que sofren un ictus enfrontan secuelas neurolóxicas que, en moitos casos, non son diagnosticadas como DCA, o que dificulta o seu acceso aos recursos e tratamentos adecuados.
Desde o Goberno Local, comprométense a seguir traballando xunto a ADACE para mellorar a atención a estas persoas, facendo fronte á demanda crecente de servizos especializados para a rehabilitación e integración social das persoas afectadas por Dano Cerebral Adquirido.