O Concello de Lugo lanza unha nova convocatoria de axudas para rehabilitación enerxética no centro
O Concello de Lugo abrirá nos próximos días unha nova convocatoria de subvencións para a rehabilitación enerxética de vivendas e locais situados no centro histórico da cidade, dentro do programa vinculado ao Plan de Recuperación, Transformación e Resiliencia (PRTR), financiado pola Unión Europea a través dos fondos NextGenerationEU. Esta segunda fase contará cun orzamento de 424.186,25 euros, co que se poderá intervir en ata 43 inmobles incluídos na área PEPRI.
O alcalde, Miguel Fernández, destacou que “estamos a facer da rehabilitación unha ferramenta real ao servizo da xente, con axudas que xa están chegando aos fogares e con novas oportunidades como esta segunda convocatoria, coa que damos continuidade ao noso modelo de cidade sostible, eficiente e pensada para mellorar a calidade de vida no centro histórico”.
A fase anterior, correspondente á Fase XVII do programa ERRP, permitiu executar melloras enerxéticas en 14 propiedades e 6 locais comerciais tras a aprobación de tres expedientes nunha sesión da Comisión de Valoración celebrada o pasado 19 de xuño. O investimento público total ascendeu a 426.800 euros, dos que 414.800 euros se destinaron á axuda base e 12.000 euros á retirada de amianto, sen que se aplicaran incrementos por situacións de vulnerabilidade.
Dado que aínda permanece dispoñible aproximadamente a metade do orzamento inicial —850.986,25 euros, cofinanciados polo MITMA e os fondos europeos—, o Goberno local decidiu activar un novo prazo de dous meses para presentar solicitudes. Este comezará a contar desde o día seguinte á publicación da convocatoria no Boletín Oficial da Provincia de Lugo.
As axudas están dirixidas a persoas propietarias de inmobles de uso residencial interesados en mellorar a eficiencia enerxética dos seus edificios. O rexedor lembrou que “é unha oportunidade clara para reducir consumo, aumentar o confort e revalorizar as vivendas, especialmente nun espazo tan sensible como o centro histórico”. Ademais, destacou que estas iniciativas tamén teñen un efecto positivo na economía local, impulsando os sectores da rehabilitación e a construción sostible.
As actuacións subvencionables deberán cumprir cos obxectivos mínimos de aforro enerxético establecidos nas bases. Poderán incluír melloras de accesibilidade ou outras intervencións complementarias sempre que contribúan ao balance enerxético global. Non serán financiadas intervencións en edificios ruinosos, operacións de baleirado e reconstrución, instalacións que utilicen combustibles fósiles ou inmobles de uso turístico, sociosanitario ou semellante.
Poderán acollerse ás axudas persoas propietarias de vivendas ou edificios de uso residencial situados na área ARI-ERRP do Centro Histórico de Lugo, sempre que as actuacións foran iniciadas despois do ano 2020 e estean aínda en execución no momento de presentar a solicitude. O prazo límite para executar as obras e xustificar os gastos esténdese ata xuño de 2026.
As bases da convocatoria están recollidas no BOP nº 159, do 10 de xullo de 2024, e tamén se poden consultar na web municipal. Desde o Concello animan a toda a veciñanza a informarse e aproveitar esta oportunidade. “Queremos que ningún fondo quede sen utilizar. A nosa prioridade é que estes recursos cheguen a quen máis os precisa e se convertan en vivendas máis eficientes, confortables e con maior valor patrimonial”, concluíu Miguel Fernández.