O Concello de Lugo participou na feira Funergal de Ourense
A edil de Participación e Servizos para a Veciñanza, Cristina López, representa ao Concello de Lugo na feira Funergal, que se está a celebrar en Ourense. Funergal é o principal punto de encontro do sector funerario do Estado e de Portugal, e ano tras ano reúne ás principais empresas e acolle as presentacións das últimas novidades do sector.
A participación neste evento, de calado internacional, contribúe á proxección do Cemiterio Municipal de San Froilán, que se está a converter nun dos cemiterios máis emblemáticos do estado.
A Tenencia de Alcaldía conta cunha importante presenza en Funergal coa itinerancia da exposición 'Arrolos ao ar' sobre o dó perinatal que, adquirindo deste xeito unha proxección internacional para dar a coñecer unha esfera de dor pouco coñecida e atendida e levando a mensaxe de apoio incondicional ás persoas afectadas pola perda durante a xestación ou período perinatal.
Ao mesmo tempo, a participación neste evento supón unha toma de contacto con profesionais, persoas xestoras e responsables de cemiterios en todo o estado a través da AFCM (Asociación de entidades funerarias e cemiterios municipais), o cal supón sempre unha aprendizaxe e un intercambio de experiencias nun sector tan específico como é o funerario.