O Concello de Lugo presenta a programación xuvenil para o primeiro semestre
A área de Xuventude do Concello de Lugo deu a coñecer a súa oferta de actividades para os primeiros seis meses do ano, pensadas principalmente para mozos e mozas de entre 14 e 35 anos.
Entre as novidades destacan os cursos de danzas urbanas e iogadanza, aos que se engaden actividades xa consolidadas como o curso de monitor de tempo libre, clases de zumba ou as excursións de sendeirismo, cun total de 243 prazas sen custo.
A maior parte das actividades desenvolveranse na Casa da Xuventude entre febreiro e xuño, dirixidas a mozos de 14 a 35 anos, e as inscricións xa están abertas a través do formulario en formulario.xuventudelugo.gal.
O concelleiro responsable, Jorge Bustos, salienta “a inclusión de cursos moi demandados e que esperamos teñan gran aceptación, como o de danzas urbanas e o de iogadanza, mantendo así unha programación con alternativas de lecer atractivas para a nosa mocidade”.
Ademais destas novidades, “manteremos propostas consolidadas no noso programa como o sendeirismo, con rutas dentro do municipio, pola provincia e pola Costa da Morte, ou o curso de monitor de tempo libre, que sempre cubre todas as prazas e permite obter un certificado oficial para traballar neste ámbito”, engade Bustos.
ACTIVIDADES
A primeira actividade en iniciarse, o venres 20 de febreiro, será o curso de danzas urbanas, unha das novidades deste semestre. As clases impartiranse todos os venres de 17.00 a 19.00 horas na Casa da Xuventude, con estilos variados como locking, popping, street dance ou hip hop. Están dispoñibles 20 prazas, que se desenvolverán ata o 5 de xuño.
As sesións de zumba terán lugar entre o 23 de febreiro e o 8 de xuño, todos os luns de 20.15 a 21.15 horas, con 12 prazas na Casa da Xuventude. No mesmo espazo e co mesmo número de prazas celebrarase o curso de ioga, desde o 25 de febreiro ata o 10 de xuño, todos os mércores en horario de 20.15 a 21.15 horas.
O 26 de febreiro comezará tamén o curso de iogadanza, unha disciplina que combina danza e movemento corporal para mellorar coordinación, flexibilidade e forza. As clases serán os venres de 19.00 a 20.00 horas ata o 11 de xuño, con 20 prazas na Casa da Xuventude.
Para que a xuventude poida acceder ao certificado de monitor de tempo libre, a área de Xuventude repite este curso con 25 prazas, que se desenvolverá do 27 de febreiro ao 17 de maio. As clases impartiranse os fins de semana en horarios intensivos: venres de 16.30 a 21.30 horas e sábados e domingos de 10.00 a 14.00 e de 16.30 a 21.30 horas.
O obradoiro de radiocontrol repite no programa tras o éxito de convocatorias anteriores. Haberá 24 prazas, e desenvolverase no Circuíto de Frigsa todos os sábados, con dúas quendas (11.00 a 12.00 e 12.00 a 13.00 horas), con catro participantes en cada horario.
O sendeirismo iniciará o 14 de marzo cunha ruta en Cervantes. Durante abril, maio, xuño e xullo están previstas outras catro excursións en sábado por diversos puntos da provincia, polo municipio de Lugo e tamén pola Costa da Morte, con 26 prazas para cada saída.