O Concello de Lugo promove un curso de reparación de equipos informáticos e telefonía móbil
A Concellería de Xuventude de Lugo lanza unha nova actividade formativa dentro do programa +XTi 24-25, cofinanciado polo Ministerio de Sanidade a través do Plan Nacional sobre Drogas.
Trátase dun curso básico de iniciación á reparación de equipos informáticos e telefonía móbil, dirixido á mocidade lucense de entre 18 e 35 anos.
O curso terá lugar no Centro de Convivencia Uxío Novoneyra, na sala C da segunda planta, os venres pola tarde e os sábados pola mañá durante os meses de abril, maio e xuño. En total, ofreceranse 60 horas de formación práctica nos seguintes días: 25 e 26 de abril; 2, 3, 9, 10, 16, 23, 24, 30 e 31 de maio; e 6 e 7 de xuño.
Entre os contidos do curso inclúense temas como a identificación dos compoñentes dun PC, o funcionamento da BIOS, as conexións e tarxetas, os periféricos ou o uso de Internet para buscar comparativas de prezos e información técnica, todo sen necesidade de coñecementos previos.
O prazo de inscrición estará aberto desde o 14 ata o 23 de abril e deberá realizarse a través da web www.lugomasxti.org, na sección Actividades/Inscricións. As prazas, un total de 15, asignaranse por rigorosa orde de inscrición entre as persoas que cumpran os requisitos: ter entre 18 e 35 anos e estar empadroadas, residir ou estudar no municipio de Lugo.
“Este curso, que en edicións anteriores tivo unha excelente acollida na súa versión centrada na reparación de móbiles, volve este ano cun enfoque máis amplo e moi práctico, adaptado aos intereses da mocidade e pensado tamén para mellorar as súas oportunidades no mercado laboral”, comentou Jorge Bustos.
O edil engadiu que “apostamos por unha programación atractiva e útil, que lles permita adquirir coñecementos técnicos sen necesidade de experiencia previa”. Ademais, destacou que “a combinación entre aprendizaxe teórica e práctica é un dos piares deste curso, pensado para que os mozos e mozas saian con competencias reais e aplicables”.