O Concello de Lugo publica a listaxe provisional das axudas para libros e material escolar

Educación recibiu 711 solicitudes e cubriranse as 400 achegas ofertadas con cheques de 100 euros

A Concellería de Educación de Lugo fixo pública este martes a listaxe provisional das axudas para a compra de libros de texto e material escolar correspondentes ao curso 2025-2026, dirixidas a familias con menos recursos.

A edil de Educación e Difusión do Coñecemento, Iria Buide, explicou que se cumpre o calendario previsto e que o obxectivo é que a axuda chegue ás familias antes do inicio das clases.

En total presentáronse 711 solicitudes, das que se cubrirán as 400 axudas ofertadas, cun importe individual de 100 euros, ata completar os 40.000 euros consignados neste plan municipal. “Este programa permite garantir que todas as nenas e nenos poidan acceder ao material escolar”, subliñou Buide.