O Concello de Lugo remata as obras no núcleo de Cacabelos de Mazoi e no acceso aos Lagos de Teixeiro
A área de Cohesión Territorial do Concello de Lugo vén de rematar dúas importantes actuacións na rede viaria rural no núcleo de Cacabelos (Mazoi) e no acceso aos Lagos de Teixeiro.
“Cada paso que damos no acondicionamento das vías rurais contribúe a fortalecer o rural, ofrecendo á veciñanza infraestruturas máis seguras e accesibles, e mellorando o día a día das familias que viven nestas parroquias”, destacou a edil Ana González Abelleira.
A primeira das actuacións, en Cacabelos (Mazoi), consistiu na mellora do firme dunha estrada mediante pavimentación con materiais de alta resistencia. Esta obra, financiada cos remanentes do Plan Único 2023, contou cun investimento de 34.040 euros e permitiu acondicionar un trazado clave para a conectividade da parroquia.
Por outra banda, acometeuse o acondicionamento do acceso municipal aos Lagos de Teixeiro, unha área recreativa de gran valor natural e histórico. Os traballos incluíron a mellora do firme mediante aglomerado en quente, así como labores adicionais para garantir a durabilidade e a seguridade da infraestrutura. Esta intervención realizouse grazas aos fondos AGADER 24-25, cun investimento de 105.368 euros.
“Estas actuacións exemplifican o valor de traballar conxuntamente con diferentes administracións para atender as necesidades do rural. Esta colaboración permítenos ofrecer respostas efectivas e avanzar na revitalización das parroquias”, engadiu Ana González Abelleira.