O Concello de Monterroso e Turismo de Galicia colaboran na humanización de sete rúas do municipio
O Goberno local do Concello de Monterroso vén de asinar un convenio de colaboración coa Axencia de Turismo de Galicia para executar un ambicioso proxecto de mellora urbana que permitirá a humanización de sete rúas da localidade.
As actuacións desenvolveranse nas rúas Álvaro Cunqueiro, Avenida do Marco, Xoán Montes, Irmán Xesús, travesía da Feira, rúa da Xesta e San Miguel.
Nos sete viarios procederáse á reparación e mellora da capa de rodadura e, en función das necesidades de cada rúa, repintaranse as marcas viarias e instalaranse novas luminarias led que contribuirán a unha mellor iluminación e eficiencia enerxética.
O investimento total desta actuación ascende a 96.430 euros, financiados integramente pola Xunta de Galicia. O alcalde de Monterroso, Eloy Pérez, acompañado polo concelleiro Balbino Martínez, visitou os puntos onde se levarán a cabo as obras e sinalou que “seguimos adiante co compromiso de mellorar estas vías que se atopan moi deterioradas, o que permitirá unhas mellores condicións de seguridade e mobilidade para os usuarios e usuarias”.