O conselleiro municipal e departamental da cidade de Brazzaville visitou Lugo
O delegado territorial da Xunta en Lugo, Javier Arias, recibiu na sede da Administración autonómica a Kouloumbou Bouanga Jule Pauldi, conselleiro municipal e departamental da cidade de Brazzaville, capital da República do Congo.
O conselleiro do Congo interesouse polas iniciativas e programas do Goberno galego en ámbitos como a formación profesional, o emprego xuvenil, o fomento do deporte como ferramenta de inclusión ou o asociacionismo entre a mocidade.
A reunión enmárcase nunha serie de encontros estratéxicos que unha delegación congoleña está a realizar en España co fin de promover o diálogo e abordar vías de cooperación entre os territorios.
Na xuntanza tamén participou o alcalde de Negueira de Muñiz, José Manuel Braña, que impulsa esta misión institucional na provincia.