O Corgo acolle o domingo 5 de outubro o último mercadiño da tempada
O Corgo volverá encherse de vida o domingo 5 de outubro, coa celebración do mercadiño organizado pola Asociación Cinco Ríos. A actividade, que terá lugar no centro da vila, reunirá postos de comida, artesanía, antigüidades e artigos de segunda man, ofrecendo unha ampla variedade de produtos para todos os gustos.
O evento constitúe unha oportunidade para que veciños e visitantes poidan atopar pezas únicas, desfrutar de propostas gastronómicas e coñecer o traballo de artesáns locais. Ademais, representa un punto de encontro que fomenta o contacto social e a convivencia, á vez que contribúe á dinamización do rural e da economía de proximidade.
Desde a organización sinalan que este será o derradeiro mercadiño antes do parón de inverno, agradecendo a todas as persoas que participaron e acompañaron durante a tempada.