O Corgo contará en agosto coa segunda edición do Mercado de Oficios
![mercado oficios corgo primera edicion](https://lugoxa.com/wp-content/uploads/2023/07/mercado-oficios-corgo-primera-edicion.jpg)
A Asociación de Veciños Os 5 Ríos, en colaboración co Concello do Corgo, convocaron para finais do mes de agosto unha segunda edición do Mercado de Oficios.
Esta cita, que se celebrou o ano pasado con grande éxito, tenta recuperar a tradición dos grandes mercados e feiras parroquiais, das que no Corgo, só quedan dúas representacións importantes, a de Gomeán e a de Adai.
Este ano, o II Mercado de Oficios será os días 26 e 27 de agosto e segundo avanzaron desde a organización, haberá degustación de cordeiro á Grella, exposición de maquinaria nova e usada, mostra de oficios e artesanais e actuacións musicais con máis sorpresas.
Polo momento, xa está aberto o prazo para inscribirse na feira, que pode facerse a través dos teléfonos 686 625 657, 670 833 909 e 648 063 894.
Ademais, este domingo, 9 de xullo, volve celebrarse o mercado mensual xunto á Cámara Agraria, tamén organizado pola asociación veciñal. Está aberta a participación de vendedores, que deberán reservar nos teléfonos anteriores. Está prevista unha exposición de venda de cabalos e ás 13.30 farase o sorteo dunha cesta doada polo Café Andaina.
Tamén haberá postos de polbo.