O Corgo rendeu homenaxe a Rafael Pardo Vales coa colocación dunha stolperstein
O Concello do Corgo celebrou un acto institucional para a colocación dunha stolperstein en lembranza de Rafael Pardo Vales, veciño do municipio e vítima do campo de concentración nazi de Mauthausen. A homenaxe converteuse nunha xornada de forte carga emotiva e simbólica, na que se puxo en valor a memoria histórica e o compromiso colectivo coa lembranza das vítimas do nazismo.
Desde o BNG destacaron o carácter especial dun acto que levaba anos sendo agardado e que, segundo sinalaron, quedará para sempre na memoria da veciñanza. A colocación da stolperstein supón un recoñecemento público á figura de Rafael Pardo Vales e unha forma de manter viva a súa historia no espazo cotián.
A homenaxe foi posible grazas ao traballo da Asociación para a Recuperación da Memoria Histórica, á colaboración do Concello de O Corgo e á disposición da familia de Rafael Pardo, en especial da súa sobriña Isabel, que permitiu a celebración deste acto.
No evento participaron tamén representantes de distintas asociacións, a Asociación de Veciños de Laxosa “Airamonte”, amizades, compañeiras e compañeiros de corporación, así como veciñas e veciños de Laxosa e doutras parroquias do concello, que quixeron acompañar este exercicio de memoria e dignidade colectiva.