O delegado do Goberno supervisa as obras que se realizan no Carme
Pedro Blanco exemplifica en Lugo o impulso do Goberno coa modernización dos destinos turísticos, con 200 millóns de euros investidos en Galicia.
O delegado do Goberno en Galicia, Pedro Blanco, destacou hoxe a aposta conxunta que o Goberno e o Concello de Lugo levan a cabo na conservación e protección do patrimonio desta cidade, que permite potenciar un turismo máis cultural. O delegado visitou xunto coa alcaldesa de Lugo, Lara Méndez, e a subdelegada na provincia, Isabel Rodríguez, as obras de recuperación da cloaca romana no barrio do Carme e os traballos de humanización do entorno, que cofinancia o Ministerio de Facenda e Función Pública a través do programa EDUSI. Previamente, Pedro Blanco realizou unha visita á Casa Consistorial do Concello de Lugo onde asinou no libro de ouro.
O delegado sinalou que o Goberno investiu “200 millóns de euros para impulsar a modernización de 43 destinos turísticos en Galicia, beneficiando a un de cada dous municipios galegos”, incluíndo Lugo. Este novo modelo turístico basease na sustentabilidade, dixitalización e valor engadido. O delegado puxo en valor este modelo turístico “de calidade e competitivo, non ligado a unha tempada concreta e que xeren riqueza a nivel local”.
Ademais, o Plan de Recuperación contempla una inversión de 2 millóns de euros para transformar a antiga fábrica da Luz de Lugo nun centro de enogastronomía, un proxecto que promoverá a dinamización e desenvolvemento na zona.
O delegado do Goberno sinalou que Lugo, da man da súa alcaldesa, “é pioneira no desenvolvemento destas políticas” e que desde o Goberno continuarase apostando pola aceleración deste cambio.
Obras de recuperación da cloaca romana do barrio do Carme
A cloaca romana do barrio do Carme é unha infraestrutura con preto de 1.700 anos de antigüidade e descuberta en 1994. O concello de Lugo impulsa a súa recuperación cun orzamento de 398.724 euros, ao abeiro da estratexia EDUSI Muramiñae, cofinanciada polo Ministerio de Facenda e Función Pública con fondos FEDER.
O proxecto ten, deste xeito, tres obxectivos básicos: realizar traballos de conservación restauración que permitan preservar para xeracións futuras esta parte do rico patrimonio arqueolóxico de época romana que alberga a cidade de Lugo; adecuación o espazo para facelo visitable e accesible, respectando a contorna e o edificio catalogado onde se sitúa; e, finalmente, a integración do discurso museolóxico cos outros restos arqueolóxicos e instalacións museísticas visitables en Lugo como parte dun único discurso da vida da cidade romana.
