O encontro en liña para familias sobre autoridades e límites será este luns
O servizo de prevención de condutas aditivas da agrupación de Concellos de Begonte, Castro de Rei, Friol, Outeiro de Rei e Rábade organiza un encontro en liña dirixido a nais e pais, educadores e outros perfís vinculados á educación dos concellos da agrupación, para abordar o tema da autoridade e límites.
Este obradoiro será impartido de xeito en liña por Carlos González Rodríguez, pediatra e escritor, experto en crianza e saúde infantil. Carlos González é doutor en pediatría e autor de varios libros de crianza e saúde infantil, entre eles Bésame mucho, Cómo criar a tus hijos con amor (2003), Mi niño no me come (1999), Creciendo juntos (2013), etc.
Nesta actividade abordarase como equilibrar autoridade e límites na educación das nenas e nenos, abordando temas como disciplina, límites, emocións, perrenchas, … todo o preciso para que o equilibrio, a harmonía, a comprensión e o afecto sexan os cementos sobre os que construír as relacións.
A sesión será este luns 18 de novembro de 18:00 a 19:30 horas e as persoas que desexen inscribirse poden facelo neste enlace ou enviando un mail a prevenciondrogas@rabade.org.