O Espazo Permacultural Lugar de Reque acolle as xornadas de permacultura e agroecoloxía Rexenera Terra
O Espazo Permacultural Lugar de Reque acolle as xornadas de permacultura e agroecoloxía Rexenera Terra, un programa que impulsa o uso divulgativo e demostrativo deste espazo, promovido pola Vicepresidencia da Deputación de Lugo, situado á beira do río Rato en Lugo.
As actividades de campo completaranse con dúas xornadas de conferencias, que se desenvolverán entre Reque e a Escola Politécnica Superior de Enxeñería (EPSE) os días 22 e 23 de novembro, coa participación de especialistas en agricultura rexenerativa.
Con estas xornadas, o espazo abre as portas a todas as persoas interesadas en coñecer de cerca a evolución das actuacións realizadas nos últimos meses, como o sistema agroforestal ou “bosque comestible” que se plantou en marzo con máis dun cento de especies distribuídas en diferentes estratos.
Os asistentes poderán participar en tarefas como a plantación e reposición de especies, o mantemento da espiral de aromáticas con pedra, a limpeza manual de adventicias, o sementado de gramíneas e leguminosas para crear cubertas vivas no chan ou o manexo de abonos verdes. Ademais, realizaranse actividades arredor da plantación de vimbio, permitindo identificar especies e aprender técnicas de poda, recolección e conservación das varas.
O vicepresidente da Deputación de Lugo, Efrén Castro, acompañado pola directora da EPSE, Rosa Romero; polo coordinador do Grao de Enxeñaría Agrícola e Agroalimentaria, Santiago Lamosa; pola responsable do Espazo Permacultural Lugar de Reque, Francisca López; e polo coordinador das xornadas, Rubén Escudero, presentou o programa, dirixido principalmente a persoas interesadas en agricultura e xardinería rexenerativa.
Efrén Castro explicou que “o Espazo Permacultural é un lugar aberto á cidadanía durante todo o ano, pero as xornadas reforzan o seu carácter divulgativo, xa que as persoas que participen nelas poderán coñecer polo miúdo as prácticas de agricultura e xardinería rexenerativa aplicadas na recuperación e revitalización do terreo”, e agradeceu “a colaboración da Escola Politécnica Superior de Enxeñería, propiciando un achegamento da universidade a este proxecto”.