O Galicia WordPress Day reúne en Outeiro de Rei a profesionais e emprendedores dixitais
A comunidade local de WordPress de Lugo organiza este sábado, 30 de agosto, a segunda edición do Galicia WordPress Day, un encontro que reunirá a profesionais do deseño web, o márketing dixital, autónomos e emprendedores interesados en coñecer as últimas novidades arredor desta tecnoloxía. O evento terá lugar no Club de Campo e Tiro de Bonxe, en Outeiro de Rei, a partir das 12:00 horas.
WordPress é a plataforma máis utilizada do mundo para crear páxinas web e tendas online, empregada por máis do 43 % dos sitios web a nivel global. En Lugo existe desde hai anos unha comunidade local activa que organiza meetups (encontros) mensuais, punto de encontro entre profesionais, estudantes e persoas con curiosidade polo mundo dixital.
Nesta segunda edición do Galicia WordPress Day, a comunidade decidiu inaugurar o curso cunha xornada diferente, aproveitando o entorno natural de Bonxe. O programa inclúe unha visita guiada polas instalacións do club, dinámicas de traballo colaborativo e resolución de retos WordPress, así como un espazo de networking para intercambiar experiencias e contactos profesionais. A organización ofrecerá comida e bebida nun xantar comunitario, ao que os asistentes poderán engadir sobremesas para compartir.
“Queremos que este evento sexa unha porta de entrada tanto para quen nunca asistiu a unha meetup como para quen xa leva anos participando. WordPress é o que nos une mais o importante é coñecernos, xerar sinerxías e demostrar que en Lugo hai talento e iniciativas dixitais de primeiro nivel”, explica Carlos Longarela, un dos organizadores do encontro.
Pola súa banda, Saúl Vérez, membro da comunidade local, subliña: “En Lugo temos unha comunidade tecnolóxica viva e accesible. Este Galicia WordPress Day é unha oportunidade para que autónomos, emprendedores e pequenas empresas da comarca se acheguen, aprendan e atopen apoio para facer crecer os seus proxectos en Internet”.
O evento está aberto a todas as persoas con interese en Internet e o mundo dixital, sen necesidade de ter coñecementos previos de programación ou deseño.
A comunidade WordPress Lugo forma parte das Meetups oficiais de WordPress, un movemento global presente en centos de cidades. O obxectivo é ofrecer un espazo gratuíto de aprendizaxe, colaboración e intercambio entre profesionais e persoas interesadas en Internet. En Lugo, lévase organizando un encontro mensual de xeito ininterrompido desde hai anos.