O GIOT-HULA incorpora unha técnica grazas a unha achega económica de Oviganic Ibérica
O Grupo de Investigación en Oncoloxía Traslacional do Hospital Universitario Lucus Augusti (GIOT-HULA) reforza o seu equipo cun novo apoio profesional tras recibir unha aportación económica da empresa monfortina Oviganic Ibérica – Queserías Prado.
A contribución, que ascende a 9.240 euros e foi formalizada mediante a Fundación IDIS, facilitou a concesión dunha bolsa de formación dirixida a Luz de Alba, técnica en Anatomía Patolóxica, que se incorporou ao laboratorio para completar un ano de aprendizaxe mentres combina esta actividade coa súa labor asistencial.
O responsable do Laboratorio de Oncoloxía, Jesús Mateos, subliñou a relevancia de contar co respaldo do tecido empresarial lucense para fortalecer a dotación de persoal, tamén en perfís técnicos, e incidiu na urxencia de impulsar economicamente os proxectos máis avanzados en investigación oncolóxica. A nova integrante do equipo especializarase en manipulación de mostras biolóxicas, cultivo celular e análise integrada de datos procedentes de proteómica, xenómica e diagnóstico tumoral.
Pola súa parte, o equipo dirixido polo xefe do servizo de Oncoloxía do HULA, Sergio Vázquez, explicou que se mantén unha procura activa de colaboracións con diversas compañías da provincia, dando prioridade ás vinculadas ao sector alimentario “pola relación directa entre a dieta e o desenvolvemento de enfermidades tumorais, tanto desde a perspectiva preventiva como na resposta a determinados tratamentos”, sinalan. Entre as principais liñas de traballo do grupo figuran o estudo das bases moleculares de varios tipos de cancro e o deseño de novas ferramentas diagnósticas non invasivas.