O Goberno de Lugo avanza no mantemento da sinalización horizontal en zonas urbanas

LugoXa
"Esta mellora da sinalización vai permitir reducir o risco de resbalóns nos pasos de peóns e incrementar a seguridade nas nosas rúas", afirmou Rubén Arroxo
renovación-de-sinalización-horizontal-Lugo
2 Apr 2025

A Xunta de Goberno Local de Lugo aprobou a adxudicación do contrato para o mantemento da sinalización horizontal en zonas urbanas, cun investimento de 100.000 euros e unha duración inicial de un ano, prorrogable ata dous anos máis.

Así o explicou o tenente de alcalde, Rubén Arroxo, que subliñou que o contrato inclúe o repintado de marcas viarias como os pasos de peóns e outras sinalizacións horizontais.

Arroxo destacou que o obxectivo principal desta actuación é mellorar a visibilidade e a seguridade viaria en toda a cidade, especialmente para peóns, ciclistas e persoas con mobilidade reducida. "Esta mellora da sinalización vai permitir reducir o risco de resbalóns nos pasos de peóns e incrementar a seguridade nas nosas rúas", afirmou o tenente de alcalde.

Os traballos de repintado empezarán a executarse nos próximos meses, aproveitando as condicións climáticas favorables desta época do ano. O bo tempo é fundamental para garantir a calidade do pintado, polo que se prevé que a intervención se realice cando as condicións meteorolóxicas sexan as máis adecuadas.

OUTRAS NOVIDADES

En paralelo, Rubén Arroxo anunciou a renovación do convenio de colaboración con Edicións Xerais para a celebración do certame literario Ánxel Fole, un evento consolidado na cidade que no ano 2025 celebrará a súa XXVII edición. Este certame, que promove a creación literaria en lingua galega, premiará a obra gañadora coa súa publicación por parte de Edicións Xerais de Galicia.

Por último, na mesma sesión, aprobouse o cambio de titularidade do posto número 4 do mercado municipal, unha froitería situada nos soportais da rúa Quiroga Ballesteros. Este cambio permitirá a continuidade das actividades comerciais e mellorar a oferta do mercado municipal, un espazo clave na vida comercial de Lugo.

⚙ Configurar cookies
0.81885004043579