O Goberno local activa un dispositivo especial de limpeza e seguridade para a festa da Carballeira
O Concello de Lugo, a través da área de Transición Ecolóxica, activou un dispositivo especial de limpeza para garantir o mantemento e conservación da Carballeira de Fingoi tras a celebración da tradicional festa estudantil, que se celebra a tarde do mércores 9 de abril.
O operativo dará comezo ás 07.15 horas do xoves 10 de abril e desenvolverase de maneira intensiva ata as 10.00 horas da mañá, co obxectivo de deixar a zona en perfecto estado no menor tempo posible.
O alcalde de Lugo, Miguel Fernández, destacou a importancia de reducir ao máximo o impacto dunha festa multitudinaria nun espazo natural emblemático como é a Carballeira. "O obxectivo é deixar a zona en perfecto estado no menor tempo posible, reducindo ao máximo o impacto dunha festa sobre un espazo natural tan representativo", afirmou. Ademais, fixo un chamamento ao civismo e á responsabilidade para garantir que a celebración transcorra con respecto ao entorno e aos veciños da zona.
Como parte do dispositivo, o Concello retirou de maneira preventiva todas as papeleiras da zona para evitar actos vandálicos e colocou colectores de 800 litros de capacidade en varios puntos da Carballeira e o seu perímetro. Estes colectores permitirán un depósito ordenado dos residuos xerados durante a festa, co obxectivo de realizar unha recollida selectiva de vidro, envases lixeiros e fracción resto. Ademais, xa se realizou unha limpeza previa do campo, retirando follas e acondicionando a zona para garantir un espazo limpo e accesible.
O operativo de limpeza contará con máis dunha decena de vehículos e maquinaria especializada, entre eles cisternas de baldeo mixto, hidro limpiadoras de alta presión, varredoras eléctricas e de GNC, camións satélite, triciclos eléctricos e vehículos Goupil, así como un furgón eléctrico con equipo de vapor para a limpeza e desinfección. Ao redor de 20 profesionais, entre condutores, peóns e maquinistas, participarán no operativo, coordinados por tres capataces que supervisarán os traballos desde primeira hora.
"O servizo de limpeza de Lugo é un dos máis eficaces e comprometidos de Galicia, e este tipo de operativos demóstrano cada ano cunha resposta áxil, ordenada e respectuosa co medio", destacou Miguel Fernández, resaltando o traballo do persoal municipal que contribúe a que a cidade mantéñase limpa e segura tras grandes eventos.
En canto á seguridade, a Policía Local despregará un operativo especial durante toda a xornada. Na tarde do 9 de abril haberá catro indicativos na cidade, dous deles especificamente destinados á Carballeira, con catro axentes asignados. Xa pola noite, un reforzo con catro patrullas será mobilizado para garantir a convivencia e intervir ante calquera incidencia. O Concello lembra que a colaboración de todos é fundamental para manter un ambiente festivo seguro e respectuoso co entorno natural e a veciñanza.