O Goberno local substitúe unha estrutura de paso no Rego de Pías en San Vicente do Veral
A concelleira de Cohesión Social e Territorial, Ana González Abelleira, visitou a parroquia de San Vicente do Veral para avaliar o progreso dos traballos de substitución dunha estrutura de paso no Rego de Pías.
Durante a inspección, estivo acompañada por representantes veciñais, cos que compartiu información sobre a intervención, cuxo obxectivo é optimizar a comunicación na zona e reforzar a seguridade viaria tanto para condutores como para peóns.
Esta obra forma parte do Plan Deputación 2024, un programa de investimentos destinado á modernización das infraestruturas municipais. Atendendo ás peticións trasladadas pola comunidade local, tamén se procederá á ampliación das barreiras de seguridade co propósito de mellorar as condicións do paso.
Coun investimento superior aos 35.000 euros, o proxecto contempla a instalación dun novo tubo de 1.800 milímetros de diámetro, a reposición do firme con zahorra e a súa posterior pavimentación mediante tripla rega asfáltica. "Este tipo de melloras son fundamentais para garantir unhas infraestruturas modernas e resistentes que dean resposta ás necesidades do ámbito rural", destacou González Abelleira.
Ademais, a edil acompañou aos veciños na revisión doutras actuacións levadas a cabo en resposta ás súas demandas, entre elas a instalación de puntos de luz en Soñar, a limpeza de cunetas na estrada que une Penarrubia e Adai, así como diversas melloras complementarias na canalización de augas, colocación de sumidoiros e instalación de reixas para asegurar un correcto drenaxe.