O Goberno central comprométese a mellorar a iluminación da rotonda de Nadela
O alcalde de Lugo, Miguel Fernández, acadou o compromiso do Goberno central para mellorar a iluminación da rotonda de Nadela e levar a cabo traballos de mantemento na Ponte Branca.
Trátase de dúas actuacións "moi demandadas e cruciais para a cidade", segundo o rexedor, quen se mostrou "moi satisfeito cos resultados desta primeira reunión co delegado do Goberno, Pedro Blanco".
O Ministerio de Transportes está a traballar para substituír as actuais luminarias VSAP por LED na rotonda de Nadela, unha infraestrutura viaria onde conflúen ata seis estradas. O alcalde indicou que "esta actuación é importantísima" e espera que estea operativa antes de final de ano. Ademais, está prevista unha remodelación do firme e o pintado da travesía.
Pola súa banda, no caso da Ponte Branca, o compromiso do Ministerio de Transportes inclúe a súa limpeza, pintado e pequenas reparacións. Segundo Miguel Fernández, esta intervención mellorará a imaxe dunha infraestrutura que é un "referente visual da cidade".
OUTROS TEMAS
Outro dos temas tratados na reunión foi o proxecto da nova Comisaría de Policía. As parcelas municipais en Abella, cunha superficie de 2.600 metros cadrados, xa foron incorporadas ao patrimonio do Estado, polo que se pode iniciar a redacción do proxecto.
Ademais, o alcalde de Lugo trasladou ao delegado do Goberno outras necesidades prioritarias para a cidade, como unha intervención na Rolda Norte para mellorar a comunicación entre o polígono de As Gándaras e o barrio. "Pensamos nun paso elevado, pero haberá que estudar as mellores solucións", explicou Miguel Fernández. Pedro Blanco confirmou que a próxima semana terá lugar unha reunión co xefe de Estradas de Galicia, a Subdelegada do Goberno e o alcalde para analizar alternativas.
No eido cultural, o Concello de Lugo impulsará a declaración do Vello Cárcere como Lugar de Memoria Democrática a través dunha reunión co Secretario de Estado de Memoria Democrática, unha proposta que conta co apoio do Goberno central.
Ademais, avanzouse na integración de Lugo no sistema Viogen do Ministerio do Interior para o seguimento e protección de vítimas de violencia de xénero. O alcalde asegurou que "todo indica que poderíamos contar co equipo policial operativo a moi curto prazo".