O grupo de teatro Achádego ofrecerá uns paseos teatrais para dar a coñecer o Cemiterio de San Froilán
A concelleira de Participación e Servizos á Veciñanza, Cristina López, anunciou unha nova e destacada iniciativa cultural que se integrará na Programación de Primavera do Cemiterio de San Froilán.
O Grupo de teatro Achádego ofrecerá unha serie de paseos teatrais en diversas xornadas, que permitirán revivir a vida e o legado de persoalidades lucenses que deixaron unha profunda pegada na historia da cidade.
A primeira das funcións terá lugar este vindeiro domingo, 23 de marzo, e estará centrada nas mulleres destacadas que marcaron un antes e un despois na sociedade lucense. Coa súa interpretación, o Grupo Achádego traerá á vida as historias destas figuras femininas que tiveron un impacto significativo no desenvolvemento cultural e social de Lugo.
A actividade comezará ás 17.30 horas, e as entradas poden reservarse con antelación nas oficinas do Cemiterio, na Oficina Municipal de Turismo ou no propio Cemiterio Municipal, cun límite de catro entradas por persoa.
Cristina López animou a todas as veciñas e veciños de Lugo a participar nesta actividade cultural, destacando que se trata dunha excelente oportunidade para "rescatar a memoria da cidade". A concelleira tamén subliñou que as visitas teatralizadas ao Cemiterio de San Froilán son "oportunidades únicas para coñecer o noso pasado nunha instalación referencial de Lugo".