O HULA inaugura unha nova edición de “Arte no hospital” con obras creadas por pacientes de saúde mental
O Hospital Universitario Lucus Augusti acolle unha nova edición da mostra “Arte no hospital”, unha iniciativa que reúne as creacións elaboradas por pacientes do Servizo de Psiquiatría nos obradoiros ocupacionais do Hospital de Día de Saúde Mental e do Centro de Rehabilitación Hospitalaria de Saúde Mental de Calde.
A inauguración celebrarase este martes 25 de novembro, ás 11:30, e a exposición permanecerá aberta ata o xoves, día 27, en horario de 9:00 a 14:30 horas. As persoas que se acheguen á entrada principal do HULA poderán contemplar e mesmo adquirir algunhas das creacións realizadas polos pacientes da área sanitaria.
A exposición estará aberta ao público os días 25, 26 e 27 de novembro na entrada principal do complexo sanitario, converténdose nun escaparate do traballo desenvolvido ao longo do ano nestes dispositivos asistenciais.
Esta proposta insírese nos programas de rehabilitación deseñados por un equipo multidisciplinar de profesionais que adaptan as actividades ás necesidades individuais de cada paciente. A finalidade da exposición, ao igual que a da elaboración das obras, é esencialmente terapéutica, xa que procura impulsar a recuperación funcional e social das persoas atendidas e favorecer a súa integración. Xunto a iso, pretende tender pontes entre a cidadanía e quen convive con problemas de saúde mental, contribuíndo a reducir o estigma que aínda persiste arredor destas enfermidades.
A organización do evento conta coa participación activa dos propios usuarios, un proceso que lles permite adquirir habilidades sociais, mellorar a súa capacidade organizativa e fortalecer o seu grao de autonomía. Baixo a supervisión dun equipo especializado, os pacientes non só crean as pezas que se expoñen, senón que tamén asumen tarefas de coordinación e planificación, o que lles ofrece unha experiencia que reforza a súa independencia e responsabilidade.
A preparación da mostra supón, ademais, un importante estímulo motivacional, xa que durante meses traballan coa expectativa de que as súas obras sexan exhibidas e valoradas polo público visitante. Esta perspectiva contribúe a incrementar a súa autoestima e a consolidar os avances obtidos durante o proceso de rehabilitación.