O lucense Brais Revaldería presenta no Festival Europeo de Sevilla ‘Fillos do Vento: A Rapa’
O cineasta lucense Brais Revaldería levará ao Festival Europeo de Sevilla unha proposta pioneira no panorama audiovisual español: Fillos do Vento: A Rapa, unha experiencia cinematográfica inmersiva que se proxectará entre os días 11 e 13 de novembro no Cartuja Center CITE.
A peza, dirixida e producida polo propio Revaldería xunto a María Fernanda Ordoñez Morla, mergulla ao espectador no corazón da Rapa das Bestas de Sabucedo (A Estrada) mediante unha instalación envolvente de proxección 270° en 8K, son espacial e elementos sensoriais sincronizados, converténdose na primeira experiencia deste tipo incluída dentro do festival sevillano.
Estreada mundialmente en Cannes Immersive 2025, onde foi exhibida no histórico Hôtel Carlton, Fillos do Vento: A Rapa foi seleccionada entre máis de 200 propostas internacionais e tamén formou parte da programación de Hot Docs (Canadá). A súa chegada a Sevilla marca un fito na historia do festival, que por primeira vez incorpora unha proxección inmersiva de gran formato dentro da súa programación oficial, abrindo así o camiño a novas formas de narrar e experimentar o cinema documental en España.
Brais Revaldería, gañador de dous premios Emmy e dun León de Ouro en Cannes Lions, sinala que “non é un espectáculo, é unha loita pola memoria. A peza pregunta que clase de natureza queremos preservar”. Pola súa banda, a produtora e directora de arte María Fernanda Ordoñez Morla explica que “buscamos borrar a liña entre observador e participante. En Fillos do Vento séntese o alento dos cabalos e o tremor do chan, mentres no horizonte aparecen aeroxeradores. É unha experiencia visceral sobre herdanza e progreso”.
Fillos do Vento: A Rapa convida a experimentar, máis que observar, a Rapa das Bestas, un ritual ancestral que pervive hoxe en diálogo tenso coa modernidade e coa expansión dos parques eólicos. A través da súa linguaxe sensorial e cinematográfica, a obra transforma a tradición galega nunha reflexión universal sobre comunidade, territorio e transformación cultural.