O lucense Nicolás Martínez Adega proclámase campión do mundo de paracanoe en Hungría
O palista lucense Nicolás Martínez Adega continúa facendo historia no deporte adaptado tras proclamarse recentemente campión do mundo de paracanoe en Hungría.
O deportista do Club Fluvial, con só 19 anos, impúxose na categoría KL3 10.000 metros sénior do Mundial de maratón, converténdose nun dos competidores máis novos en lograr o título.
O delegado territorial da Xunta en Lugo, Javier Arias, recibiu hoxe ao campión para felicitalo persoalmente polo seu éxito internacional.
Arias destacou a súa traxectoria “de esforzo e perseveranza, un auténtico caso de resiliencia e superación”, e subliñou que “a satisfacción polo triunfo é dobre: dun lado porque levou o nome de Lugo ao máis alto do piragüismo, e doutro, porque representa un exemplo inspirador para a mocidade”.