O Ministerio de Transportes inicia a modernización de varios túneles do porto de Pedrafita na A-6

Para garantir a seguridade dos traballadores e usuarios, estanse producindo afectacións ao tráfico durante esta primeira fase

O Ministerio de Transportes e Mobilidade Sostible puxo en marcha as obras de mellora e modernización de varios túneles situados no tramo do porto de Pedrafita, entre os quilómetros 407 e 464,5 da autovía A-6, ao seu paso polas provincias de Lugo e León. Os túneles afectados por estas actuacións son os de Cereixal, Doncos, San Pedro e Pedrafita en Lugo; e Trabadelo, A Escrita e Vilafranca en León.

Cun orzamento de 22,7 millóns de euros (IVE incluído), estas obras están financiadas a través dos fondos europeos NextGenerationEU, dentro do Plan de Recuperación, Transformación e Resiliencia (PRTR). Os traballos inclúen a renovación dos equipos eléctricos, a instalación de sistemas de iluminación de emerxencia, así como a modernización dos sistemas de ventilación e outras melloras en materia de seguridade e eficiencia enerxética.

As intervencións comezaron de forma gradual entre o 22 de abril e a primeira semana de maio, estando xa en marcha as obras nos túneles de Pedrafita, Neira e Doncos, e prolongaranse ata o 30 de xuño de 2025.

Para garantir a seguridade dos traballadores e usuarios, estanse producindo afectacións ao tráfico durante esta primeira fase. En todos os túneles, agás no de Vilafranca, manterase operativo polo menos un carril por calzada para asegurar a fluidez do tráfico.

Na provincia de Lugo, o túnel de Pedrafita-1 (sentido A Coruña) permanece pechado desde o 22 de abril, debido ás obras de impermeabilización do viaduto do Castro. Todo o tráfico nese punto desvíase pola calzada esquerda, a través do túnel de Pedrafita-2 (sentido Madrid), polo que non se prevén novas afectacións neste túnel.

Desde o luns 28 de abril, tamén se produciron cortes de carril no túnel de Neira (km 463,8) e no túnel de Doncos (km 441,5).

Ademais, a partir das 9:00 horas do luns 5 de maio, comezarán novas afectacións ao tráfico con cortes de carril no túnel de Cereixal, situado no km 454,5.

Polo momento, no túnel de San Pedro non se prevén afectacións ao tráfico antes do 30 de xuño de 2025.