O Mundial de Motocross volve a Galicia co Gran Premio de España en Lugo
O Gran Premio de España de MXGP regresará a Galicia na primavera de 2025, consolidando a Lugo como epicentro do motocross internacional. A Federación Internacional de Motociclismo e MXGP confirmaron que o evento se celebrará os días 10 e 11 de maio no Circuíto Municipal Jorge Prado, tras o éxito da edición anterior, que reuniu a miles de afeccionados.
O evento contará co apoio da Xunta de Galicia, que foi clave na organización desta proba, destacando o seu impacto turístico e económico tanto para a comunidade autónoma como para a cidade de Lugo. Ademais, o Concello de Lugo e a Deputación de Lugo tamén contribuíron para reforzar a posición da cidade como sede de referencia no motocross mundial.
O delegado territorial da Xunta en Lugo, Javier Arias, destacou que a cidade repite como sede do campionato "grazas ao nivel demostrado o pasado ano na nosa primeira edición, froito dun traballo ben feito liderado por Motopark co respaldo da Xunta de Galicia". Así mesmo, resaltou que "nesta edición reforzamos o noso compromiso como socios principais na organización dun evento que coloca a Lugo na élite deste deporte".
Durante a fin de semana do 10 e 11 de maio, o Circuíto Jorge Prado acollerá as probas do Campionato do Mundo de MXGP, MX2 e WMX, ademais dunha proba do Campionato Europeo de 250 c.c. As entradas xa están á venda en distintas modalidades: xeral, tribuna e VIP.
O evento reunirá algúns dos mellores pilotos do mundo. Na categoría MXGP, a principal competición masculina, destacará a participación do galego Rubén Fernández, que ten gran afinidade con este circuíto. Na categoría feminina WMX, a catalá Daniela Guillén, vixente subcampioa do mundo, será unha das favoritas ao título. Cabe destacar que o actual campión do mundo de MXGP, o lucense Jorge Prado, competirá esta tempada no Supercross dos Estados Unidos.
O impacto económico do evento na cidade de Lugo é significativo. Na edición anterior, xerou un retorno directo na hostalería e servizos locais de máis de 4 millóns de euros, grazas á presenza de máis dun cento de pilotos cos seus equipos e miles de afeccionados.
Ademais do seu impacto económico, o evento reforza a proxección internacional de Lugo e Galicia, consolidándoas como referentes nos deportes de motor. "O feito de que España acolla dúuas probas do Mundial, en Madrid e en Lugo, dentro dun calendario de vinte carreiras en dezaoito países, coloca á nosa provincia entre os mellores escenarios do motocross mundial", concluíu o delegado territorial.