O Museo de Lugo contará cun novo modelo de visitas guiadas de curta duración
O Museo Provincial de Lugo propón para este mes de agosto un novo formato de visitas guiadas con “Sabías que?”, visitas de curta duración, alternativas á visita completa, nas que o persoal do Museo ofrecerá ás persoas visitantes breves explicacións sobre as pezas escultóricas e pictóricas das exposicións permanentes.
Trátase, sobre todo, de datos de descuberta recente, froito da investigación que se desenvolve no propio Museo, ou de aspectos menos coñecidos e divulgados de obras e artistas.
A iniciativa pretende reforzar a atención das persoas visitantes e poñer en valor as pinturas e esculturas das exposicións permanentes do Museo Provincial de Lugo.
Estas visitas non requiren concertación previa. Ofreceránse nas seguintes datas e horarios os días 8,9,10 e 11 de agosto ás 17.00 horas, os días 15,16,17 e 18 de agosto ás 12.00 horas, os días 22, 23, 24 e 25 de agosto ás 17.00 horas e os días 29, 30 e 31 de agosto ás 12.00 horas.