O Museo Provincial de Lugo estrea a sección de numismática renovada co sestercio da caetra como peza central
O Museo Provincial de Lugo abriu ao público a súa sección de numismática e medallística completamente renovada, un espazo no que destaca a exhibición permanente do sestercio da caetra, unha moeda declarada BIC vinculada á orixe da cidade e adquirida pola Vicepresidencia da Deputación no 2023.
O vicepresidente da institución provincial, Efrén Castro, e a deputada de Cultura, Iria Castro, presidieron a inauguración dun ámbito que incorpora tamén outras seis moedas —dúas suevas e catro visigodas— ingresadas ese mesmo ano e que se converten en eixo dunha mostra estable composta por 677 bens, entre os que se contan 551 moedas, un billete, 87 medallas e 38 elementos monetarios diversos, o que supón o 6,6% do total das coleccións numismáticas do museo.
A sala, situada na panda sur do claustro alto e cunha superficie de 70 m², foi deseñada seguindo parámetros de accesibilidade universal, protección preventiva e seguridade das pezas. A dirección científica do proxecto estivo a cargo da directora do Museo, Aurelia Balseiro García, xunto ao equipo do Departamento de Arqueoloxía e Historia do MPL, formado por Mª Ofelia Carnero Vázquez e Enrique Alcorta, recentemente xubilado.
Durante a apertura, a deputada de Cultura, Iria Castro, salientou que “a renovación da sección de numismática culmina unha aposta política polo patrimonio e polos museos iniciada en 2023 coa compra do sestercio da caetra”, e expresou o seu agradecemento “á implicación e ao labor da dirección e do persoal do Museo neste proxecto que pon en valor unha das coleccións numismáticas máis destacadas do Estado e reforza o papel de Lugo como referencia internacional no estudo da romanización”.
A proposta museográfica incorpora vitrinas renovadas, melloras na iluminación e na sinaléctica, así como pantallas interactivas nas que se proxectan representacións en 3D das moedas, configurando un discurso expositivo inmersivo que combina a precisión científica co propósito divulgativo e o atractivo estético do espazo.
Co obxectivo de adaptarse aos hábitos actuais do público e mantendo os criterios de accesibilidade que identifican ao MPL, integrouse tamén unha estación táctil que facilita a interacción coa colección e unha máquina expendedora de moedas para que as persoas visitantes poidan levar un recordo físico da súa experiencia. Estes novos elementos achegan dinamismo á sala e contribúen a unha mellor comprensión dos contidos para todo tipo de públicos.