O Museo Provincial de Lugo ofrece actividades infantís e familiares durante o mes de agosto
O Museo Provincial de Lugo propón un verán cheo de experiencias lúdicas e educativas para nenos e familias, cunha programación especial ao longo do mes de agosto que inclúe contacontos, campamentos e obradoiros para todas as idades. Aínda estás a tempo de participar, pero as prazas son limitadas!
Do 5 ao 8 de agosto celebrarase o campamento Sentir o Museo, unha actividade pensada para nenos e nenas de entre 6 e 12 anos. Desenvolverase en horario de 10:30 a 13:00 h e contará cun total de 10 prazas dispoñibles. A inscrición debe realizarse enviando un correo a concertacionsrmp@gmail.com.
A programación continúa os días 12 e 13 de agosto con Contos que habitan entre museos, un espazo de narración oral e creatividade dirixido a crianzas de 5 a 12 anos, en horario de 11:00 a 13:00 h.
Por último, os días 14, 19 e 21 de agosto terá lugar o obradoiro Caetra Lvcemsivm, unha actividade pensada para todas as idades que se desenvolverá de 10:00 a 13:00 h e que permitirá coñecer a cultura romana a través do xogo e a creación.
Todas as actividades son de balde e requiren inscrición previa no correo concertacionsrmp@gmail.com. O Museo Provincial de Lugo convida ás familias a gozar dun agosto diferente, no que a cultura, a historia e a arte se viven en primeira persoa.