O Museo Provincial proxecta o documental 'No Se Oye', unha peza da Fundación TIC
O Museo Provincial de Lugo converteuse nun espazo para a memoria e a reflexión coa proxección do documental No Se Oye, unha obra audiovisual realizada e producida por alumnado da Fundación TIC que recolle os estremecedores testemuños de dúas mulleres afectadas por unha presunta trama de sustracción de bebés nas casas de maternidade da cidade durante a década de 1960.
A sesión contou tamén cun coloquio posterior no que participaron tanto as protagonistas como o equipo responsable da creación do documental, xerando un espazo de diálogo arredor dun tema que durante décadas permaneceu silenciado.
A actividade forma parte do programa Cousas Nosas. Historias Soterradas, unha iniciativa da Rede Museística Provincial de Lugo que aposta pola recuperación da memoria esquecida a través da cultura, a participación comunitaria e a visibilización das feridas do pasado.
Con esta proposta, o Museo reafirma o seu compromiso como institución activa na defensa dos dereitos humanos e na construción dunha sociedade máis xusta e informada, usando a creación cultural como ferramenta de denuncia e transformación social.