O Parque de Rosalía de Castro acolle unha xornada lúdica e cultural polo Día das Letras Galegas
A Asociación de Veciños Parque de Rosalía-Recatelo organiza o vindeiro 17 de maio, con motivo do Día das Letras Galegas 2025, unha completa xornada de actividades no parque Rosalía de Castro, en Lugo. O evento desenvolverase entre as 17:00 e as 20:00 horas, no palco da música do parque.
Durante a tarde, as persoas asistentes poderán gozar dunha mostra de música e cultura tradicional galega a cargo do grupo Os Xílgaros de Lugo, que presentará o seu repertorio e algunha novidade preparada especialmente para esta ocasión. Este ano, a celebración está dedicada ás Cantareiras, poñendo en valor o seu legado na música tradicional galega.
Ademais, haberá numerosas actividades para os máis pequenos, entre elas xogos tradicionais organizados por Xotramu (Xogos Tradicionais Muimenta), así como obradoiros de pintacaras, globoflexia e malabares.
A organización recomenda inscribirse previamente para participar e reservar a merenda, que incluirá produtos galegos. Para iso, pódese chamar ao 681 395 599.
O evento conta coa colaboración da Xunta de Galicia e busca fomentar a cultura popular galega e ofrecer un espazo de convivencia interxeracional.