O Pazo dos Deportes contará cun videomarcador central e reformarase a cuberta
A Vicepresidencia da Deputación de Lugo anunciou a instalación dun videomarcador central no Pazo, unha das actuacións previstas no programa de mellora e modernización da instalación provincial que está a desenvolver a área de Deportes.
O vicepresidente da Deputación, Efrén Castro, informou de que, tras recibir as conclusións dun estudo sobre a capacidade de carga da cuberta, se confirma que a estrutura do Pazo permite a instalación dun equipamento moderno de última xeración.
O estudo, realizado nas últimas semanas, concluíu que a cuberta pode soportar un peso puntual máximo de ata 2.800 kg, o que é suficiente para a instalación dun videomarcador avanzado que inclúa as últimas innovacións tecnolóxicas.
Castro destacou que, “a partir do estudo e a información recollida, os servizos provinciais están a traballar nos pregos para licitar o contrato de compra e instalación do videomarcador, co obxectivo de realizar a instalación de cara á vindeira temporada”.
Estudo de carga
O estudo de carga da cuberta foi realizado pola empresa L&M e requiriu un minucioso traballo a partir do proxecto de execución elaborado polos arquitectos Jorge Zapata Suárez e Luis Gorozarri Del Vale.
Para levar a cabo a análise, foi necesario revisar e contrastar os documentos do proxecto coas medicións reais da estrutura, realizadas in situ e con imaxes de dron.
Este traballo permitiu determinar que a carga puntual máxima que se pode suspender da estrutura da cuberta non pode exceder os 2.800 kg, distribuídos en catro apoios situados na capa superior da maia.
Rehabilitación da cuberta
Ademais da instalación do videomarcador, a Vicepresidencia da Deputación de Lugo tamén ten en marcha a contratación dunha obra de rehabilitación integral da cuberta do Pazo.
Esta intervención consistirá na aplicación dunha membrana impermeabilizante de poliurea sobre a superficie da cuberta, que ten unha extensión de 8.500 metros cadrados.
Estas actuacións forman parte do esforzo por mellorar e modernizar as instalacións do Pazo, permitindo mellorar a experiencia tanto para os usuarios como para os eventos que se aloxan no complexo.