O Pleno da Corporación Municipal de Lugo aprobará a declaración institucional polo 8M
O Pleno da Corporación Municipal de Lugo aprobará este xoves a declaración institucional polo 8M, promovida pola área de Muller, Igualdade e Inclusión.
O documento, consensuado por todas as forzas políticas, busca avanzar cara a unha sociedade máis xusta e igualitaria para todas as mulleres e nenas.
Así o explicou a concelleira Ángeles Novo, quen destacou que “os dereitos das mulleres deben ser unha prioridade para as institucións públicas”, en consonancia co lema deste ano adoptado polas Nacións Unidas: Para todas as mulleres e nenas: Dereitos. Igualdade. Apoderamento.
A edil subliñou que avanzar en materia de igualdade permitirá reducir as diferenzas existentes, especialmente no mercado laboral, onde persisten a fenda salarial, as dificultades no acceso a postos de responsabilidade e a desigualdade de salarios entre homes e mulleres.
A declaración institucional tamén abordará outras necesidades para crear unha sociedade máis equitativa e sostible en todos os ámbitos, impulsando economías máis sólidas e unha maior seguridade social. Neste sentido, unha das propostas incluídas no documento é o compromiso do Concello de Lugo de fomentar a inserción laboral das mulleres en condicións de igualdade, garantindo que as nenas e mozas de hoxe poidan acceder aos empregos que desexan no futuro.
Outros obxectivos destacados inclúen dar visibilidade ás mulleres esquecidas, especialmente ás do ámbito rural, así como a aquelas que sofren discriminación múltiple debido á discapacidade, identidade, etnia, idade, orientación sexual ou nivel socioeconómico. Tamén se busca reforzar a incorporación da perspectiva de xénero en todos os ámbitos da sociedade e incrementar a participación activa das mulleres na vida política, económica e social a nivel local.
Por último, a declaración institucional fai un chamamento á loita contra a violencia machista, incidindo na importancia da sensibilización e no reforzo dos apoios integrais para as vítimas desta lacra social. Como concluíu Ángeles Novo, “é fundamental seguir traballando para garantir unha sociedade máis igualitaria e libre de violencia contra as mulleres”.